Акафист Пресвятой Богородице перед Ея иконой, именуемой «Млекопитательница»

Кондак 1
Избранней от дщерей человеческих Материю быти Христа Бога нашего принесем от любви нашея песни хвалебныя; Ты же Сына Божия неизреченно родившая и яко Младенца млеком питавшая, сохрани поющих Тя от обышедших нас зол, скорбей и напастей, да зовем Ти немолчно: Радуйся, Богородице Дево, Млекопитательнице, милостию Твоею нас присно питающая.
Икос 1
Ангелов лицы в вертеп приникнувши и узревши тамо Деву чистую, Сына млеком питающую, возопиша Тебе, Благословенней: Радуйся, рождшая мира Творца; радуйся, питающая Питателя вселенной. Радуйся, пеленами повивающая Повивающаго небо облаки; радуйся, дланьми носящая на Херувимех носимаго. Радуйся, яко Детищ мал всех Тобою родился еси; радуйся, яко Младенец плачущ и мирови радость дающ. Радуйся, Богородице Дево, Млекопитательнице, милостию Твоею нас присно питающая.
Кондак 2
Видящи Святая Дева при персех Своих Богомладенца лежаща, глагола Ему: како возмогу Тя питати, Творца Моего, Емуже вся воинства небесная вопиют: Аллилуиа.
Икос 2
Разумная вся тварь недоразумевает како Дева пребываеши, Младенца млеком питаеши. Обаче неизреченному таинству сему веруя, благоговейно взываем: Радуйся, Дево неблазная; радуйся, Девице прекрасная. Радуйся, жен украшение; радуйся, Мати чистотствующая. Радуйся, дев правило; радуйся, Благословенная в женах. Радуйся, Богородице Дево, Млекопитательнице, милостию Твоею нас присно питающая.
Кондак 3
Сила Вышняго осени Тя, Богородице Дево, и подаде Ти крепость повити и питати Егоже вси концы земли величают и поют Ему песнь великую: Аллилуиа.
Икос 3
Имея дерзновение велие к Рожденному от Тебе, призри на скорби и беды, нас обышедшия, умоли Питаемаго Тобою за ны грешныя и недостойныя да избавльшеся от лютых напастей, возглаголем Ти тако: Радуйся, Рождшая Сладчайшее Утешение наше; радуйся, произрастившая Благословеннаго благодатию. Радуйся, Мати наша Всеблагая; радуйся, чадами Твоими нас нарекшая. Радуйся, благонадежное наше прибежище; Радуйся, Богородице Дево, Млекопитательнице, милостию Твоею нас присно питающая.
Кондак 4
Буря скорбей и напастей обдержит ны, трепещем да не потонем в мори житейстем, но явися нам, яко голубица Ноева, ветвь надежды подающая нам, вопиющим Богу: Аллилуиа.
Икос 4
Слышащи жена благоразумная глаголы живота вечнаго Сыном Твоим вещаемыя, прослави Тя, вопия Ему: «Благословенно чрево, носившее Тя и сосца яже еси ссал», темже приими и наша немощныя похвалы сицевыя: Радуйся, бисере драгий, Всечудная Мати; радуйся, велия в женах. Радуйся, ветвь присноцветущая; радуйся, животе приемляй Сокровище освящения. Радуйся, чаше златая, Христа — Небесную Манну носящая; радуйся, Хлебом Жизни нас возрождающая. Радуйся, Богородице Дево, Млекопитательнице, милостию Твоею нас присно питающая.
Кондак 5
Боготечныя руце Твоя, Всепетая, простри к нам немощным, воздвигни нас унылых, спаси отчаянных, да в радости душевней, ничем не смущаемей, вопием Сыну Твоему: Аллилуиа.
Икос 5
Виде Тя в Дусе богоглаголивый Исаия, яко имаши Дева сущи во чреве прияти Рожденнаго из Тебе, возгласи Ти: Радуйся, Предвечнаго рождшая; радуйся, яко Тобою с нами Бог бывает. Радуйся, пророчеств сбытие; радуйся, пророков веселие. Радуйся, всего мира чаяние; радуйся, рода нашего утешение. Радуйся, Богородице Дево, Млекопитательнице, милостию Твоею нас присно питающая
Кондак 6
Проповедницы присноглаголемии Твоего милосердия суть чудеса многообразнии, источаемыя от иконы Твоея святыя, ихже обильно нам даровала еси, да покланяющеся Тебе и Богомладенцу Христу, вопием гласы хвалебныя: Аллилуиа.
Икос 6
Возсия во обители Саввы Освященнаго, яко солнце светозарное, всечестная икона Твоя, Млекопитательнице именуемая, пред Нею же преподобный со иноки выну прославляше Тя, вопиюща: Радуйся, обители нашея пречудное украшение; радуйся, от врагов видимых и невидимых твердое заступление и защищение. Радуйся, молениям нашим присновнемлющая; радуйся, прошения наша благоутробно приемлющая. Радуйся, горестная воздыхания наша утишающая; радуйся, слезы наша отирающая. Радуйся, Богородице Дево, Млекопитательнице, милостию Твоею нас присно питающая.
Кондак 7
Хотящи преподобный Савва отъити в жизнь вечную, пророчески рече: яко по мнозех днех приидет во обитель сию царев сын, ему тезоименитый, сей приимет святую икону Владычицы во благословение и воспоет радуяся: Аллилуиа.
Икос 7
Новый угодник Савва, святитель Сербския земли, прииде во обитель древнюю и прият по словеси его святую икону и принесе ю на гору Афонскую во обитель Хиландарскую и вси насельницы ея радостно взываху ко Владычице мира: Радуйся, присно о нас грешных промышляющая; радуйся, николиже нас грешных забывающая. Радуйся, милость Твою тысячекратно во святых чудотворных иконах Твоих обновляющая; радуйся, новыя знамения щедрот Твоих ныне изливающая. Радуйся, любящих и чтущих Тя зело возлюбившая. Радуйся, Богородице Дево, Млекопитательнице, милостию Твоею нас присно питающая.
Кондак 8
Странное чудо и недоразумеваемое есть неверным и суемудренным како от иконы Твоея чудеса истекают, мы же многократными милостями в сем утвержденныя пети Господу Богу, даровавшему таковую Помощницу роду христианскому дерзаем: Аллилуиа.
Икос 8
Весь мир видимый и невидимый блажит Тя, Богородице Дево, яко усердную Заступницу нашу, присно помогающую нам, в море бед и скорбей погибающим, да Тебе Единей нашей Надежде вопием: Радуйся, Сына Твоего за нас грешных умоляющая; радуйся, в бедах и обстояниих скоро помогающая. Радуйся, молений наших скорое услышание; радуйся, горестей жития нашего верное услаждение. Радуйся, мир и упокоение сердцам нашим дарующая; радуйся, веру нашу укрепляющая. Радуйся, крест жизни нашея понести нам помогающая. Радуйся, Богородице Дево, Млекопитательнице, милостию Твоею нас присно питающая.
Кондак 9
Всяко ублажая Тя, Всеблагая, Иоанн Дамаскин рече, яко удобее молчание, неже пети Тя, но любовию понуждаемии, восхваляем Тя и поем Сыну Твоему песнь великую: Аллилуиа.
Икос 9
Витийствовати не хощем, но с любовию и слезами притекаем к Тебе, яко Матери чадолюбивей, и из глубины сердца вопием: Радуйся, Радость наша неизреченная; радуйся, Утешение наше несказанное. Радуйся, домов наших ограждение; радуйся, чад наших покрове. Радуйся, чад наших воспитание; радуйся, юных от путей гибельных охранение. Радуйся, Богородице Дево, Млекопитательнице, милостию
Твоею нас присно питающая.
Кондак 10
Спасти всех нас и хощеши и можеши, Пресвятая Дево, аще прибегаем ко всечестному Покрову Твоему, сего ради молим Тя: избави нас от горьких бед и скорбей, нашедших на ны, привлецы сердца наша к благостному прибежищу и научи вопити Богу, из Тебе рождшемуся: Аллилуиа.
Икос 10
Стену нерушиму Тя нарицаем и вемы, яко истину глаголем, уведехом бо, яко зело любиши род христианский, милости и щедроты Твоя присно источаеши вопиющим Тебе: Радуйся, от сетей вражиих нас охраняющая; радуйся, от навета злых человек нас спасающая. Радуйся, вражду сродник наших на любовь пременяющая; радуйся, мир и тишину в домах наших сохраняющая. Радуйся, намерениям благим вспомоществующая; радуйся, советы благия на сердце полагающая. Радуйся, Богородице Дево, Млекопитательнице, милостию Твоею нас присно питающая.
Кондак 11
Пение всякое принесоша Ти, Пренепорочная, пророцы, предзревше безсеменное зачатие и рождение от Тебе Сына Божия; пастырие же и волсви, видевше Тя рождшую и питавшую; и весь мир крещеный хвалит Тя. Веруем, яко до скончания века не умолкнет песнь хвалебная от рода христианскаго Рожденному Тобою: Аллилуиа.
Икос 11
Светило светозарное Ты еси, Пречистая, нам во тьме грехов и страстей погибающим, просвещающее наша темныя очи, сердце озаряющее высшим разумом, поющее Тя: Радуйся, Путь, Истину и Жизнь рождшая; радуйся, истинному Богу нас вручающая. Радуйся, светом Евангелия наши мрачныя души озаряющая; радуйся, мудрость века сего ни во чтоже вменяющая. Радуйся, мудрость превысочайшую, яже есть любовь, в сердцах наших насаждающая; радуйся, помоще всем и во всем. Радуйся, Богородице Дево, Млекопитательнице, милостию Твоею нас присно питающая.
Кондак 12
Благодать Божия явися чудно в земли Российстей от подобия иконы Твоея Млекопитательницы пренесенныя. Темже и гора Афонская и страна наша, ныне люте страждущая, но на милость Твою несуменно уповающая, вопиют милосердому Богу: Аллилуиа.
Икос 12
Поюще Те яко Спаса нашего родившую и пеленами повившую и млеком питавшую, уповаем, яко ни коеже Твое прошение безответно от Него пребудет, понеже Сам Сладчайший Иисус обеща ту; тако имуще в сем твердую надежду, восхваляем Тя, Отрадо и Утешение наше: Радуйся, лютыя скорби в радость претворяющая; радуйся, ожесточение сердец наших любовию Твоею умягчающая. Радуйся, любити Бога и ближняго нас научающая; радуйся, в скорбех наших упование на Бога возлагати наставляющая. Радуйся, наши хладныя молитвы любовию Твоею согревающая; радуйся, молитвы нас грешных и недостойных яко милостивая Матерь приемлющая. Радуйся, Богородице Дево, Млекопитательнице, милостию Твоею нас присно питающая.
Кондак 13
О Всехвальная Богородице Дево, нашего Господа и Владыку млеком питавшая, не презри сего скорбнаго моления нашего, но умоли Сына Твоего, да дарует нам грехов прощение, болезней исцеление, да сохранит нас от глада, мраза, смертоносныя язвы, нечаянныя смерти и от всех бед и обстояний, да избавльшеся сих, радуяся зовем Ему: Аллилуиа.